KS Personeel

Aftrede-voordele

Dit is belangrik om te onthou dat u voordele by aftrede heelwat verskil van dié by bedanking. Ek gee hieronder vir u ‘n uiteensetting van u voordele indien u na 60-jarige ouderdom sou aftree:

• Geen penalisasie op u pensioenvoordele nie.
• ‘n Pro rata bonus (wat deur die WKOD betaal word) indien u uit diens tree voordat u u jaarlikse bonus ontvang.
• Indien u verlof krediete (“capped leave”) het, sal dit ook uitbetaal word deur die WKOD.
• Mediese subsidie (mits u reeds 15 jaar of meer in diens van die Staat was en vir die laaste 12 maande die hooflid van u mediese fonds was).
• Begrafnisdekking van R20 000 vir u en/of u eggenoot, asook R8 000 per kind.
• Verhuisingsvoordeel (die redelike werklike koste van die verpakking, vervoer, versekering en uitpak van 'n werknemer se persoonlike besittings wanneer hulle verhuis weens aftrede).

   - U moet voortydig met die WKOD hieroor in verbinding tree. Maak seker u het reeds drie verskillende kwotasies bekom.

   - Vind asb. die WKOD beleid oor die verhuisingsvoordeel op hul webtuiste vir die volledige terme en voorwaardes.

• Indien u jonger as 60 is, mag u kies om vroeg af te tree op/na die ouderdom van 55, maar voor die ouderdom van 60.

   - Spesiale vergunning word gemaak vir diegene wat voor 01 Mei 1996 aangestel is en wat ononderbroke diens het: hulle mag aansoek doen om vroeër af te tree op/na die ouderdom van 50.

   - Let daarop dat daar penalisasie van 0.33% per maand afgetrek word vir elke maand voor die ouderdom van 60, indien u voortydig aftree. Daardie berekening is reeds gedoen voordat u enige pensioenvoordele ontvang, m.a.w. u ontvang u pensioenvoordele nadat die penalisasie reeds geïmplementeer is.

Twee-Pot Stelsel

Met die verandering na die Twee-Pot Stelsel sal dit goed wees om met ‘n finansiële adviseur te gesels oor u pensioenvoordele.

Lyra Wellbeing (die WKOD se Employee Health and Wellness diensverskaffer) bied gratis finansiële advies aan WKOD werknemers. 

U kan hulle gerus kontak by:

0800 111 011

wced@icas.co.za

GEPF Berekeninge

Indien u definitief van plan is om uit diens te tree, stel ek voor dat u kontak maak met die GEPF om ‘n amptelike pensioenvoordele-staat aan te vra. 

U kan die GEPF kontak by: 

0800 117 669 

WesternCape.Enquiries@gpaa.gov.za 

enquiries@gepf.co.za

U is ook welkom om die GEPF instapsentrum te besoek: Maandae tot Vrydae van 07:30 tot 16:00.

Buitengracht Centre, 4th Floor

125 Buitengracht Street

Cape Town, 8000

Die GEPF het onlangs ‘n GEPF-selfdiens en mobiele toep vir werknemers geloods – u kan toegang daartoe verkry deur die GEPF-webwerf by www.gepf.co.za te besoek, of laai dit af op Google Play of Apple App Store. 

Indien u enige probleme tydens registrasie ondervind, kontak gerus 

012 319 1400

selfservicesupport@gpaa.gov.za 

U kan ook ‘n beraming van u voordele op die toep besigtig; asook u begunstigde(s) besigtig en/of wysig, indien nodig.

Uitbetalings en die implikasies

Die GEPF het in die verlede aangedui dat hulle normaalweg 60-90 dae neem om pensioenvoordele uit te betaal. Neem dit asb. in berekening.

Indien u dus aftree met volle mediese voordele (soos hierbo verduidelik), sal u die nodige reëlings met u mediese fonds moet tref, om self die volle maandelikse betalings te maak tot en met u pensioengelde uitbetaal. Tussen u mediese fonds en die GEPF sal daardie maande se subsidie weer aan u terugbetaal moet word vir die tydperk wat u dit self moes betaal.

Onttrekking van u opgehoopte Behuisingsubsidie Spaarfonds (ILSF)

Indien u voorheen as huurder die behuisingsubsidie ontvang het – as opgehoopte spaargeld binne u Individu-Gekoppelde Spaarrekening (ILSF) – sal u vroegtydig moet aansoek doen om dit te onttrek wanneer u uit diens tree. Indien u dit nie doen nie, verbeur u dit teen die datum van uitdienstrede.

SARO-registrasie

Onderwysers wat uit diens tree en die onderwys verlaat, moet verkieslik kennis gee dat hulle registrasie by die Suid-Afrikaanse Raad vir Opvoeders (SARO) opgehef moet word. Onthou, hulle word verantwoordelik gehou vir die maandelikse lidmaatskapfooi wat aan SARO oorbetaal word.

Indien hulle dit nie doen nie en u na maande/jare sou terugkeer tot die Onderwys, sal hulle eers die uitstaande fooie moet vereffen alvorens SARO hul registrasie weer sal aktiveer.

Die volgende stappe moet gevolg word:

1. Stuur ‘n formele bedankingsbrief per e-pos aan ethics@sace.org.za; en
2. Heg gesertifiseerde kopieë van u ID en SARO-registrasiesertifikaat aan.

Onthou om ‘n bewys van dié e-pos waarin u SARO versoek om u te deregistreer, te hou.

SAOU lidmaatskap

Indien u graag u lidmaatskap van die SAOU wil behou nadat u die diens verlaat het, vra ons dat u asb. kontak maak met ons kantoor vir  verdere bystand.  

021 914 2441

saouwk@saou.co.za